السلام عليكم و رحمة الله و بركاته
طيب ، تجيني أسئلة مرة مرة كتير عالآسك بخصوص الجامعة ، و كتار سموني عميدة الجامعة من باب التريقة *أصلاً عادي* فحبيت أكتبلكم كل شي أعرفو عن الجامعة بدايةً من أول يوم !
اليوم الأول = يوم الضياع
إلا لو كانت قريبتك أو صحبتك معاكي في نفس الفرع و أخدتك جولة في الجامعة حتضيعي يعني حتضيعي !
مو نفسياً ، قصدي حرفياً حتتوهي ، يعني أصلاً مرة عادي أبداً ما ضعت في أول يوم و أنا أدور مبنى الإنجليزي. أبداً.
طب نعترف لبعض ، الغالبية منكم حيكونوا جداً متحمسين للجامعة و يا ولللد سرت كبيرة و حركات و ما حتناموا الليل و حتروحوا مواصلين و عيونكم قد الريال ! المهم ترى مو كويس بس بما إني عارفة إنو الغالبية العظمى ما حتسمع الكلام و حتواصل ما حخش عالنقطة دي :p
توتة إيش نسوي أول يوم ؟
أول يوم الصراحة أحسو يعتمد على إيش إنتو تبوا تسووا !
يعني ممكن تروحوا تتمشوا و تتعرفوا على أماكن المباني عشان لا تضيعوا اليوم اللي بعدو ،
ممكن تروحوا تشوفوا آماكن كلاساتكم ..
كيف؟
أطبعوا جدولكم الجميل و حيكون مكتوب فيلو رقم المبنى و الكلاس و دوروا عليه و دي خريطة الجامعة - فرع السليمانية - عشان لا تضيعوا بكرا بس انتبهو بعض المباني اتغير رقمها
طبعاً الغالب الغالب أول يوم محد حيدي محاضرة بس احتياطاً روحوا.
السنة اللي فاتت أول و تاني يوم رحتهم دخلت كلاس الإنجليزي و جاتنا آستاذة المادة و أتعرفت علينا و سرنا نهرج معاها ، تالت يوم قالولنا المستوى الرابع يبدأوا بعد الحج !
آول أسبوع أفتكر بس اللي بدآت معانا هيا دكتورة الكيميا و الباقيين بدأوا من الآسبوع اللي بعدو ، طبعاً كل دكتورة و نظامها فعشان كدا الأفضل المفضل تروحوا احتياطاً :-)
إيش نلبس ؟
اللي تبغوه ! مع احترام المكان اللي إنتو فيه.
( لكل مقام مقال )
و لكل مكان لبس ، فلا تلبسوا المحزق الملزق و تجيبوا الكلام لنفسكم و لا أقولكم ألبسوا كاتم مكتّم !
عادي جداً تلبسي بنطلون أو تنورة و قميص مرتب طويل و تلمي شعرك و ترتبيه و تطلعي آخر حلاوة.
و طبعاً الكعب حطوا إكس كبيرة عليه !
ترى حتمشوا و تمتروا الجامعة تمتير فمحد خسران غيركم :p
يعني من أمثلة الملابس المسموحة
بالنسبة للمكياج ، أول شي حطوا كريم مرطب و يا حبذا فيلو واقي شمس عشان الشمس حتصقع فيكم و كل يوم في الجامعة = جلسة تان
طبيعية !
و بعدين رتبوا حواجبكم ، حطوا بلشر خفيف و رطبوا شفايفكم و يا سلام عليكم ❤_❤
و لو تبوا تخفوا عيوب بشرتكم على خفيف تقدروا تستخدموا
BB cream ❤
أرجوكم راعوا إنو ترى صباح و إنكم في مكان تعليمي مو فرح ، شغل الأراقوزات ما نبا نشوفو طيب ؟ :p
الجوالات طبعاً عادي سواء بكاميرا أو بدون بس إلا ما تجيكم موظفة أمن من حيث لا تحتسبوا و تقولك دخليه الشنطة ! فعادي دخليه و لما تمشي للموظفة طلعيه تاني.
أبداً لا تسوي قوية مستوية على موظفات الأمن ، ابتسمي في وجهها حتى لو هيا مكشرة خديلك الأجر و اتجنبي المشاكل معاها مرة محد حيجيكي يقولك "واو خطيرة هجدتي موظفة الأمن" بالعكس ، احترمي تُحترمي :-)
طبعاً في كم يوم انمسكت عشان لبسي مخالف بس مو من حقون الأمن ، أحياناً موظفات الجامعة نفسهم يوقفوا عند البوابة ، و اتمسكنت عليهم قلتلهم إني قمت متأخر لبست أي كلام ، و ترى منجد ما بكشت عليها xD
و مشتني عادي الحمدلله بس تعرفوا المثل اللي يقولكم ( مو كل مرة تسلم الجرة ) فلا تستخدموا الحجة دي كتير xD
عموماً أنا كل ما أحس لبسي يكون مشكوك فيه مخالف و كدا أدعي ( و جعلنا من بين أيديهم سداً و من خلفهم سداً فأغشيناهم فهم لا يبصرون ) ، ما أمزح :p
أوپس نسيت البطاقة!
عادي ، لا تنفجعي و لا تخافي ، أول ما تدخلي اعترفي بذنبك عند موظفة الأمن و حتديكي تصريح دخول و قبل لا تخرجي من نفس البوابة روحي اختميها أو وقعيها عند الشؤون ، و ترى المشوار للشؤون حيخليكي تحرّمي تنسيه تاني و كمان ، لو نسيتيه تلاتة مرات المرة الرابعة أو التالتة يدفعوكي ٥٠ ريال غرامة !
ياخي حر :(
لا تنسوا تدعوا ( اللهم أجرنا من حر جهنم ) ، يعني أحسنلكم من التأفف والله.
لو مرة مبنى كلاسك بعيد تقدري تركبي قولف كار ببلاش ووهووو !
*ترى مدري ليش أنا و صحباتي كنا نركبو تمشية :p*
أو جيبي مظلة ، ألبسي قبعة لطيفة على راسك يعني دبروا نفسكم لأنو لا مفر من الحر :(
ياخي برد !
طبعاً أبداً ما أقصد الجو برا أي مبنى !
مبنى العلوم الجديد = فريزر دجاجات :(
*إلا لو المكيف خرب*
و برضو لو أخدتو في المدرج في مبنى العلوم القديم ترى مرة برد و جو ينوم و أنا نمت مرتين في كلاس الإحصاء عشان أخدناه هناك :p
فجيبوا معاكم جاكيت في الأيام اللي تكون عندكم كلاسات هناك
صرافات الجامعة
تاريخ ٢٥ من كل شهر و أتوقع كل أحد مضيع يومو و تاريخو حيحفظ التاريخ دا عشان إيش ؟
!! المكااااافأة
اليوم دا حتلاقوا أغلب بنات الجامعة مترصين كأنهم صف ضومنة قدام الصرافات لمدة يومين إذا ما كان تلاتة و بعدهم بيوم تجوا تبوا تسحبوا تلاقوا الصراف فاضي :(
الحل ؟
اسحبوا مكافآتكم من صراف سامبا برا الجامعة أو استنوا أسبوع .. ترى ما حتطير :p
بس انتبهوا تخلوها تتراكم لأنو لو اتعدت فترة معينة الفلوس في الحساب يسحبوه عليكم -.-"
الترفيه في الجامعة
صح نبغاكم تشدوا حيلكم و تكرفوا حبتين في الجامعة عشان توصلوا للي تبغوه و لكن دا مايمنع إنتا ننبسط في نفس الوقت!
في جامعة الملك عبدالعزيز نوادي ترفيهية و تعليمية منها :
نادي تعليم اللغة الكورية
نادي تعليم اللغة اليابانية
نادي حركة للرياضة و الأنشطة الرياضية
نادي فني
و مدري إيش كمان المهم ترى حتى أنا ما كنت أدري إنو عندنا دي الحركات :p
اشتركوا في النوادي دي ، رفهوا عن نفسكم و اندمجوا في الجامعة اللي حتقعدوا فيها سنوات عمركم الجاية إن شاءالله !
بالنسبة لمن فين تسجلوا تقدروا تروحوا مبنى شؤون الطالبات و تسألوا هناك :-)
عندنا نادي رياضي ؟
إيوا عندنا و يسمى بالخيمة الرياضية و للأمانة دخلتو مرة وحدة و كان عبارة عن ملعب !
و ما آعرف أكتر من كدا عنو
و ما آعرف أكتر من كدا عنو
كافتريات الجامعة !!
مبنى ١٨ و المسمى ب(الملتقى) دا فيلو بنينوس و جوفريز و فيلو عربية بودي شوب ! فجأة مرة ، أعرف!
و باقي الكافتريات موزعة في أنحاء الجامعة.
كافتيريا مبنى ٧ فيها باسكن روبنز
الكافتيريا اللي قدام مبنى ١٢ يبيعوا ساندويتشات البيك بعد الساعة ١٠ و ورق العنب اللي عندهم أطعم من اللي في كافتريا مبنى ٧ < عن تجربة :p
الكافتيريا اللي جمب مبنى ١٢ تبيعلكم بطاطس مقلي جديد مو مقلي من أول و يبيعوه زي باقي الكافتريات
كافتريا مبنى الآداب يبيع ساندويتشات طعمية!
و باقي الكافتريات حتلاقوا فيها مشروبات غازية ، عصيرات ، مناقيش ، شاورما ، ساندويتش ناقيت و و و المهم اللي تحسب نفسها حتنحف في الجامعة دي تنسى الفكرة مدام تاكل من عندهم ;p
عن نفسي كنت أحب أجيب ساندويتش من بيتي و بس أشتري عصير أو مويا من الجماعة عشان مافيا أوقف في الزحمة.
و باقي الكافتريات موزعة في أنحاء الجامعة.
كافتيريا مبنى ٧ فيها باسكن روبنز
الكافتيريا اللي قدام مبنى ١٢ يبيعوا ساندويتشات البيك بعد الساعة ١٠ و ورق العنب اللي عندهم أطعم من اللي في كافتريا مبنى ٧ < عن تجربة :p
الكافتيريا اللي جمب مبنى ١٢ تبيعلكم بطاطس مقلي جديد مو مقلي من أول و يبيعوه زي باقي الكافتريات
كافتريا مبنى الآداب يبيع ساندويتشات طعمية!
و باقي الكافتريات حتلاقوا فيها مشروبات غازية ، عصيرات ، مناقيش ، شاورما ، ساندويتش ناقيت و و و المهم اللي تحسب نفسها حتنحف في الجامعة دي تنسى الفكرة مدام تاكل من عندهم ;p
عن نفسي كنت أحب أجيب ساندويتش من بيتي و بس أشتري عصير أو مويا من الجماعة عشان مافيا أوقف في الزحمة.
و بس دا اللي خطر على بالي بخصوص أول يوم !
و لو حابين أغطي موضوع تاني يخص الجامعة أوغيرو تقدروا تتواصلوا معايا على تويتر و تدوني اقتراحاتكم
إن شاءالله استفدتوا و أتمنى لكم يوم سعيد ، و عام مليااااان إنجازات !
و صل الله و بارك على سيدنا و حبيبنا محمد و على آله و صحبه و سلم
توتة ❤
