السلام عليكم و رحمة الله و بركاته
بوست اليوم يتعبر فضفضة علنية .. أظن ؟
طيب ليش الحلطمة ؟
*للأمانة بلكن عشان دوبي متعلمة الكلمة لول*
و عشان الحلطمة هي الشي الوحيد اللي كنت بسويه اليومين اللي فاتوا!
طيب آحكيكم قصة ؟
زي ما آغلب اللي يتابعوني على تويتر يعرفوا ، حلمي الكبير جداً هو إني آدرس طب و آسير دكتورة و ما إلى ذلك ..
و زي ما الكل عارف .. ربنا ما كتبلي هادا الحلم.
طيب ؟ إيش كانت ردة فعلي ؟؟
في البداية *طبعاً بعد البكبكة اللانهائية* اتخطيت الموضوع و صبرت نفسي و قلت آصلاً كنت دايماً أدعي ( رب اكتبلي الخير حيث كان و رضني به ) و فعلاً ربي كتبلي الخير و لو ما كان في الشي اللي كنت آبغاه!
عموماً ، قبل كم يوم و لمدة ٤ آيام حضرت دورة
Teach Me Medicine
و اللي يقوم بتنظيمها كل سنة طلاب الطب الدفعة اللي تسبق الدفعة الجديدة للدفعة الجديدة و كانت الدورة مخصصة فقط لطلاب و طالبات الطب بس السنة دي الحمدلله فتحوها للتخصصات الصحية الباقية.
مقدمة الدورة كانت عبارة عن
screen captures
لتويتات البنات يوم نتايج التسكين و ظهور نتايج قبولهم في الكلية المرغوبة ، كلية الطب.
و أتخيلوا عاد إحساسي .. إحساس تشوفي رغبة الكل أو الأغلب اتحققت و تويتات فرحة و الكل يبارك للتاني و تشوفي تويتات صحباتك ، و إنتي ؟ تويتتك في الدرافتس.
طبعاً خنقتني دموعي بس إيش اللي أبكي في وسط الناس !!
" تغريد أمسكي نفسك ، فكري في حاجة تانية "
طبعاً بعدها فصلونا بنات الكليات الصحية التانية عن بنات كلية الطب البشري لأنو كل كلية حتعرف عن نفسها و إلخ لحال فخرجت الحمدلله من المكان داكا و رحنا كلاس تاني و اتعرفنا على بنات كليتنا ( كلية العلوم الطبية التطبيقية ) و بدأوا بنات كل تخصص يتكلموا عنو.
عجبتني مقولة طالبة في الكلية تخصص تقنية مختبرات طبية ، شهد " حتى لو ما كانت الكلية دي رغبتك الأولى ، مدام استخرتي و ربنا كتبلك دخولها فهي خيرة بإذن الله " و الحمدلله قلبي اتطمن.
دا غير إنو هيا و باقي بنات التخصص جداً حببوني فيه و حمسوني عليه و رجعت البيت مبسوطة الحمدلله.
آخر يوم من الدورة جمعونا كلنا بنات كل الكليات الصحية و أدونا كم محاضرة من كم دكتورة كانت أبرزهم د/سامية العمودي و د/حنان قاضي و غيرهم .. طبعا الكلام المفروض يكون موجه للجميع بس حسيت بشوية تحيز لكلية الطب و سار كل كلامهم عن الطب و كل ما زاد كلامهم ازدادت الحسرة في قلبي و اتألمت بزيادة.
عاد وقت ما عرضوا الفيديو تبع كليتهم و إنجازاتهم و صورهم و و و .. خنقتني العبرة و حسيت لو أحد دقني بالغلط بكيت :(
المهم قعدت أتحلطم أو آبربر و ألوم نفسي و كل أحد أنا لييييييش ما دخلت طب !!
بس الحمدلله ، فترة بسيطة و عدت في وقتها و فقت على نفسي ، اللي كنت بسويه غير إنو غلط ، حرام. اعترضت على قضاء ربنا! استغفرك يا رب سامحني ..
و طبعاً على قد الحلطمة اللي اتحلطمتها ، في المقابل جاتني كمية رسايل تشجيع ، كانت سبب بعد الله سبحانه و تعالى في وقوفي مرة تانية و دي بعض منها ..
خلاص يا توتة يا بطة ، خلاص سلبية ، يكفي تشاؤم و يكفي حلطمة !
*على فكرة شكلي حسوي مسابقة في البوست دا : كم مرة تم ذكر كلمة حلطمة ؟*
:p
المهم ، زبدة القصة ..
أول حاجة : سبحان الله ربنا ما يكتب حاجة لعبادو المؤمنين إلا لخيرة نعلمها أو نجهلها ، ممكن نشوف الخيرة دي دحين و ممكن بعدين ، المهم خيرة ربنا جاية جاية.
الاعتراض على قضاء الله و السلبية و التشاؤم و إني أبدأ سنوات دراستي بالمشاعر السيئة دي عمرها ما كانت الحل.
طب أصلاً أنا كدا و لا كدا قاعدة في الكلية دي طول السنة الجاية ، ليش ما استغلها و أعيشها لحظة بلحظة و أستمتع
كمان فيها ؟ ليش لأ ؟
فلو لا سمح الله ربي ما كتبلكم الشي اللي تبغوه ، اعتبروه خيرة. أصلاً مو تعتبروه ، هوا خيرة مدام من عند الله صح و لا لأ ؟ و لا تخلوا التشاؤم يلاقي الطريق لقلبكم لأنكم حتتعبوا و حتسود الدنيا في وجهكم و حتضيع عليكم فرص كتيرة !
قال تعالى : {وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ} [البقرة: 216]}.
تانياً : الناس اللي تشجعكم ، تلهمكم ، تساندكم و توقف معاكم في ضيقتكم حتى لو بالكلمة الطيبة .. أتمسكوا بيهم بيدكم و رجولكم و سنونكم! دول حيكونوا سبب بعد الله سبحانه و تعالى في نجاحكم ، دول هما اللي حيوقفوكم بعد الله كل مرة تطيحوا فيها و تحسوا إنكم فقدتوا الأمل و فقدتوا نفسكم.
سواء كانوا أمكم و أبوكم ، أخوانكم ، أخواتكم ، صحبات ، أصحاب .. احتفظوا بيهم و اشكروا المولى كل يوم عليهم.
شعارنا إيش ؟ نو حلطمة نو كراي.
أمزح و اللي لحنها يجيني تويتر نتفاهم ههههههه :p
اللهم لك الحمد حتى ترضى و لك الحمد إذا رضيت و لك الحمد بعد الرضا و لك الحمد على كل حال
سبحانك ربي ما شكرناك حق شكرك
سبحانك ربي يا من نسأله الخير فيعطينا إياه
على فكرة ، آصحاب القلوب النقية اللي تم ذكرهم موجودين على تويتر
و صل اللهم و بارك على سيدنا و حبيبنا محمد و على آله و صحبه أجمعين.
توتة.
OMG YOUR STORY IS LIKE MINE :))
ReplyDelete