اليوم المنتظر! ١٧ رمضان ١٤٣٥ هـ

السلام عليكم و رحمة الله و بركاته ❤️

كيفكم يارب طيبين ؟ رمضانكم مبارك و كل عام و إنتو و الأمة الإسلامية بخير ❤️

و جااااااء اليوم المنتظر لطلاب السنة التحضيرية ❤️❤️

يوم نتائج التسكين ! *و ليس يوم القيامة يا سادة و عشان كدا بلاش اكسترا دراما الله يرضى عليكم*

أنا عارفة حالتكم دحين ، 

دقات قلب متسارعة ، خوف ، حماس ، شوق عشان تعرفوا اتخصصتوا فين ؟ مستقبلكم إيش ؟ تعب سنة كاملة نتيجتها إيش ؟ 

بس دقيقة ، نوقف للحظة ! و نتزكر لنا كم حاجة قبل اليوم المنتظر لا يجي ، 

١- قال تعالى : " إنا لا نضيع أجر من أحسن عملاً " 

٢- قال تعالى : " عسى أن تكرهوا شيئاً و يجعل الله فيه خيراً كثيراً "

٣- و قال تعالى : " لئن شكرتم لأزيدنكم " 

اللي خايفين من النتيجة ، خايفين ما ينقبلوا في التخصص المرغوب ، خايفين تعبهم يروح عالفاضي ، اتأملوا أول آية ، ربنا ما يضيع تعب أحد ، و اجتهادك حق سنة كاملة عمرو ما يروح هباءً منثوراً و ربنا يعطي على قد اجتهادكم و سعيكم ، و أكتر! ❤️

اتطمنتوا ؟ طب اتأملوا الآية اللي بعدها ، لو ربنا سبحانه و تعالى ما كتبلكم نصيب في التخصص اللي تبغوه مو معناتو ما سويتو كويس ، لكن الخيرة دائماً في كل ما كتبه الله و حنعرف الحكمة ورا كل دا و لو بعد حين ❤️

و آخر آية ، عشان لو ربنا أراد و كتبلكم دخول التخصص اللي من صغركم تحلموا بيه ، حمدالله و شكره يكونوا أول شي تسووه عشان ربنا يزيدكم في العلم ، المكانة ، و في الفهم و حاجات تانية كمان ❤️

و أخيراً ، قال تعالى في حديث قدسي " أنا عند ظن عبدي بي " فظنوا به خيراً تجدوا خيراً كثيراً ❤️

و صلى الله و بارك على سيدنا محمد و على آله و صحبه أجمعين ❤️

توتة xx

حلمي يستاهل ، و حلمك ؟

بسم الله الرحمن الرحيم

و الصلاة و السلام على سيد المرسلين محمد صلى الله عليه و سلم و على آله و صحبه أجمعين

طيب ، أول شي لازم أقولو هوا إنو من زامااااااااااااااااعععن ما كتبت في مدونتي

و أشكر كل من سألت و طلبت مني أرجع أكتب تاني و أهو رجعت و ححاول ما أهملها تاني :(

*حضن كبير*

طيب ، بسم الله نبدأ !

كتار جوني في الآسك .. تغريد حلمي أتخصص طب *أو أي تخصص كان* بس كتار حوليني يحطموني و يقولولي حتضيعي سنين عمرك تدرسي و ما حتتوظفي إلا نهاية عمرك و  إلخ من الكلام السلبي .. و يكونوا جداً حابين التخصص و حلمهم منذ الأزل لكن كلام الناس السلبي مأثر عليهم

طيب أنا أقولكم ..

 أول قاعدة : الاستمتاع بالوقت يلغي ضياعه - لجين داغستاني

قال صلى الله عليه و سلم : " من سلك طريقاً يلتمس به علماً ، سهل الله له طريقاً إلى الجنة " الله <3

في كل يوم و كل دقيقة من العمر اللي يفكروه الناس " ضايع " في سبيل العلم .. ربنا يقرّبنا و يسهّل لنا طريق بإذنه إلى جنته

طب اتخيلوا معايا إنكم كل يوم تصحوا و إنتو بتعيشوا و بتحققوا وحدة من أحلامكم ؟ و لا تدرسوا التخصص اللي تحبوه بكل نهم و استمتاع ! غير الأجر من الله إن أحسنّا النوايا و جددناها كل صباح ، بالله في أحلى من كدا ؟

ما أظن :")

تاني قاعدة : كلام الناس ؟ .. أي ناس ؟

 طول عمرنا من صغرنا إلين نكبر إلا ما حنمر بناس سلبية و ما همها و لا يشغلها شي إلا تحطيم الناس و تعجيزهم عن الأشياء اللي هما نفسهم عجزوا عنها !

أنا عارفة إنو مو كل أحد يقدر يعيش على مبدأ " كلام الناس ما يهمني " لكن .. فكروا فيها ، بعد 15 - 20 سنة اتخيلوا نفسكم بتشتغلوا في وظيفة ما كانت طموحكم و بتعيشوا حياة ما كانت اللي تحلموا بيها .. هل الندم اللي حتحسوه وقتها يستاهل تسمعوا كلام الناس ؟

طبعاً لأ !!

و على فكرة ، التحطيم مو شرط يكون من أعدائك و لا من الناس اللي ما تحبك ! أعرف أشخاص اشتكولي من أمهاتهم و من أخوانهم .. و أنا شخصيا جاني من أقرب صحباتي ..

اتخيلوا بس تروحوا بأحمس ما عندكم تحكوا أعز و أقرب ناس ليكم : اسمعوا ، ترى قررت أتخصص التخصص الفلاني و إن شاءالله حتشوفوني شي كبييير في المستقبل B-)

و يردوا عليكي : امممم .. متأكدة تقدري ؟ مادري يعني إنتي مرة أكتيف في السوشيال ميديا و عندك هواية التصوير و موهوبة فيها  حتقدري تسيبي كل دا عشان تدخلي التخصص اللي تبيه ؟خلاص اتخصصي شي تاني

قد إيش انكسر قلبي وقتها ، قد إيش انكسر خاطري و ما زال مكسور من كلمتهم ، يعني سبت كل الدنيا أنا و جيت أبغاكم تتحمسولي و تتحمسوا معايا و كدا ردكم ؟ :| .. لكني جمعت نفسي و قلتلهم : إيوا أقدر تدروا ليش ؟ عشان حلمي يستاهل !

و كلكم مهما كانت أحلامكم .. كلكم أحلامكم تستاهل

تستاهل تشوف النور

تستاهل تتعبوا عشانها

تستاهل تجروا وراها ، تتمسكوا بيها و تحققوها

صحيح الله سبحانه و تعالى لسا ما كتبلي الحلم اللي أبغاه و كنت أتمناه و لكني لسا في الطريق و زي ما يقولوا

IT'S NEVER TOO LATE !

أغلب الناس اللي تحطمك ماهي عارفة قدراتك الكامنة و حتى لو عرفتها حتحاول تدفنها ، حتى إحنا نفسنا أحياناً ما نعرف إيش جواتنا من قدرات .. صح الله سبحانه و تعالى قال : " لا يكلف الله نفساً إلا وسعها " .. لكن هل جربتوا إنتو وسع أنفسكم يوصل لفين ؟

أختملكم هرجي الكتير بكلام جميل قرأته لـ تيم الفلاسي

" الدنيا كم فيها ؟  سبعة بليون ؟ تعرف لو سبعة بليون قالولك (لأ) أنت بتقدر تنجح من أبسط حلم عندك لأكبر حلم حتى لو بتحكم العالم ، لأن لو سبعة بليون قالولك (لأ) عندك (نعم) وحدة من الله بأنه بيوفقك و بيسير لك أمورك و يحقق لك مرادك لو الشي فيه منفعة لك و لغيرك "

#كن_حيث_لايريدون_أن_تكون

Follow your dreams, because if YOU didn't, NO ONE will !

لو عندكم أي أسئلة أو استفسارات 

أستناكم على

Twitter: @Taghreed_F

Ask.fm/TaghreedFelemban

حب كتير ~

توتة xx