تجربتي كطالبة سنة تحضيرية #2

السلام عليكم و رحمة الله و بركاته

بوست اليوم حيكون عن الجزء التاني من تجربتي كطالبة السنة التحضيرية

الجزء الأول موجود في اللينك التحتاني

تجربتي كطالبة سنة تحضيرية #1

الترم التاني: خطة ألف

خطة ألف مكونة من أربعة مواد أساسية اللي هما : ( رياضيات ، فيزياء ، مهارات الاتصال ، حاسب آلي ) أخدت الرياضيات مع أستاذة هتون شعيب ، الفيزياء مع أستاذة ريم الوافي ، مهارات الاتصال مع أستاذة شريفة الغامدي و أخيراً الحاسب مع أستاذة سارة نصيف

على فكرة .. نصيحة ( المزاكرة أول بأول ) لم تطبق دا الترم أببببببببداً .. و مني فخورة بالشي دا بس الحمدلله على كل حال :")

المهم!

حنتكلم أول شي عن الرياضيات: المادة تعتبر سهلة ، خاصة للي كان تأسيس الرياضيات تبعهم في الثانوي كويس لأنو 100% نفس اللي أخدتوه في الثانوي
حتزاكروا طبعاً من الكتاب و من اللي تكتبوه في المحاضرة ورى أستاذتكم و لا تنسوا الوورك شوب ، اختبارات الأترام اللي قبلكم .. إلخ دي مرة مهمة فلا تنسوها أبداًّ
بالنسبة لأستاذة هتون شعيب .. ياختي يانااااس مرة ماشاءالله ما عمري رحت مكتبها بس لو رحت يمكن بس عشان أحضنها و أقولها إنتي أحسن أستاذة رياضيات في الحياة و أمشي هههههههه *Creepy student alert*
اماشاءالله تبارك الله شرحها ممتاز و تفهم مزبوط و عندها أكاونت عالتويتر ترد فيه على أسئلة طالباتها و أنا منهم و في يوم من أيام الأسبوع أظن الربوع مرة ما تجي فيه لكن لو طلبتيها تجي تفهمك شي مهم حتجي و تساعدك الله يسعدها يارب
دايماً تقول الأشياء اللي ممكن تجي في الاختبار و لما تقول كدا .. ترى حيجي في الاختبار!
 ( الخبر الحلو: في 10 درجات بونس ( 3 في الاختبار الدوري الأول - 3 في الاختبار الدوري التاني و 4 في الاختبار النهائي
^ صحبتكم ما أخدت و لا نقطة من دول .. برضو الحمدلله على كل حال

الفيزياء: بدأت الترم مع أستاذة لبنى سندي .. كلهم مدحوها ليا و حركات بس الصراحة ما كنت أفهم .. ترى بس أنا و لا الكلاس كلو أعجبو في الشرح .. بس عشان كانت تشرح عالباوربوينت و أنا من النوع اللي عشان أفهم و تثبت المعلومة لازم مسألة تطبيقية عالقانون تتحل قدامي و ما شفتها تسوي كدا .. المهم بعدين جاتنا أستاذة ريم الوافي
 الفيزياء سهلة نسبياً ، برضو في حاجات أخدتوها في الثانوي و حتجي اللي هيا قوانين نيوتن و العيال :p
 الكتاب .. شفتوا الكتاب دا ؟ أنسوه
لا أمزح .. لا ما أمزح -_- .. حقيقي ترى طول الترم ما مسكت الكتاب
كنت بزاكر من ملخصات هناء فرحان و أشرف بركات و ممكن تلاقوهم في مكتبة الخوارزم و ملخصات أستاذة هناء موجودة على موقعها الجامعي لو ما كنت غلطانة
ركزوا على التيست بانك حق هناء فرحان و نماذج الاختبارات حقتها لأنو ساعات بيجيبوا نفسو نفسو حتى الارقام نفسها بس لا تفرحوا ترى النماذج كتيرة حتحفظوا إيش و لا إيش .. بس برضو سهلين!
أستاذة ريم عن نفسي أحسها مررة ممتازة ماشاءالله و تفهم و مرة حبيت شرحها و كل ما تشرح قانون على طول بعدو تحل مسألة تطبيقية و هوا دا المطلوب يا عم !
برضو نفس الخبر الحلو اللي عند الرياضيات في الفيزياء عندكم 10 درجات بونس بنفس التوزيع

مهارات الاتصال: المادة اللي فجأة عربي هههههههههه حقيقي كدا حسيت عشان فجأة الترم الأول كلو إنجليزي *مو الشرح ، المزاكرة قصدي* و فجأة ترجعي عربي
المادة .. مملة عشان كلها أشياء متعارف عليها يعني حيعلموكي كيف تتواصلي مع الناس .. ياخي مو أنا بتواصل أهو حتجوا تعلموني إيه ؟ الحلو يا بنات المدارس المطورة أو نظام المقررات إنو تقريباً كل شي في المادة دي أخدتوه في مادة مهارات إدارية *هوا اسمو كدا؟* أو مهارات حياتية .. مدري المهم أخدتوه
غير إنو ممل ترى مادة سهلة حاولوا تجيبوا كامل فيها و سيبوا التخبيص عالمادتين اللي فوق
حيكون بس في اختبار دوري تاني و اختبار نهائي نظري
و حيكون عندكم كم تكليف عملي .. زي مثلاً مهارة الإلقاء ، كتابة سيرة ذاتية ، الحوار .. إلخ
و كمان حيكون في اختبار قراءة و حيكون في اختبار سمعي .. لول دا بالله ركزوا عالأرقام و الأسماء و كدا .. تصدقوا محد في الكلاس جايب الدرجة الكاملة في الاختبار دا .. طلعنا كلنا صنج هههههههه
المهم زي ما قلت مادة سهلة الله يرضى عليكم حاولوا تجيبوا كويس فيها .. طبعاً الاختبار الدوري التاني عبارة عن أول تلاتة فصول و النهائي كل الفصول بس صدقوني سهل عشان كلو تطبيق في حياتنا اليومية و نعرف نسويه بإذن الله
الأستاذة .. عادي ياخي طيبة و كدا يعني .. ماعرف إيش اقول عنها الصراحة إنسانة طيبة بس ما كنت أحب المادة عشان حسيتها مملة بس مرة رحتلها مكتبها و مرة كانت متعاونة عشان غبت وقت تكليف الحوار .. اللي عجبني قالتلي أرسليلي التكليف عالإيميل تبعي و فعلاً رسلتو بس عندي وسوسة هل رسلت للإيميل الصح أو لأ و قلت ليه ما ترد الأستاذة .. بس فعلاً ردت عليا و طمنتني إنو تكليفي وصل و حبيت إنها قالتلي بدل لا أقعد موسوسة .. كمان شرحها وافي ماشاءالله و ما عليه كلام

الحاسب الآلي: كلام كتير و تطبيق أكتر .. الحلو هنا إنو اللي تزاكروه ترموه وراكم بعد ما تختبروه .. دا يمكن أحسن شي سووه لينا في الحياة
برضو تقريباً نفس المنهج اللي في الثانوي و طبعاً في اختبار عملي و نظري
الكتاب كلامو كتيييير .. كيف تزاكروه ؟ أنا أقولكم .. صح كلكم حتقولوا : ياخي ترا أعرف أستخدم الباوربوينت أروح من غير مزاكرة عادي
لا مو عادي .. إلا إذا كنتوا مدركين أم البرنامج فطبعاً عادي و يا حظكم
غير كدا لأ!
أنا كيف كنت أزاكرو .. كنت أتخيل نفسي أفتح البرنامج و أقعد أطبق أو حقيقي أفتحو و أبدأ أطبق .. كدا حقيييقي المعلومة حتثبت و مستحيل تنسوها
أما لو كان كلام نظري .. الله يعينكم عالحفظ
أستاذة سارة كانت مرة جيدة الله يسعدها و طيبة و تشرح كويس و تجيكي إلين عندك لو ما فهمتي شي أو واجهتي مشكلة

طبعاً الكلام اللي هنا أعتمدتوا بناءً على خبرتي و تجربتي و تجارب صحباتي من الخطة المقابلة
و إن شاءالله يستمر الوضع إلين دفعتكم و غيركم و أتوقع إنو حيفضل كدا عشان إن شاءالله الكلام الي هنا يكون أفادكم

و بس .. فجأة خلص الترم التاني !
و هو منجد كان كدا .. فجأة خلص .. كأن الترم مر في غمضة عين

السنة التحضيرية سنة حلوة و مرة في نفس الوقت
حتتعلموا أشياء كتيرة .. كيف تعتمدوا على نفسكم ، كيف تزاكروا من غير تأشير .. إلخ
حتحسوا بتعب .. حتكرفوا كرف الحمير .. و حتبكوا في نقطة ما خلال السنة دي

لكن اللحظة الحلوة و الأهم يوم تشوفوا نتيجة تعبكم و حلمكم يتحقق

يوم ربنا إذا أراد الخيرة لكم فيه .. يكتبلكم تدخلوا التخصص اللي تتمنوه

و أنا هنا بأستنى اليوم دا

 ( و بأدعي كل يوم و كل لحظة ( رب اكتب لي الخير حيث كان و رضني به

ممكن كل أحد هنا و من قبل لا يدخل الجامعة خلاص قرر التخصص اللي يبغاه

هيا تبا تسير دكتورة ، هوا يبا يسير صيدلي ، و دول يبوا يدخلوا إدارة أعمال 

لكن الخيرة دايماً دايماً في اللي ربنا يكتبوا .. مهما كان! و دا اللي علمتني هوا صحبتي التانية أسرار السلمي

علمتني إنو بدل لا أدعي يارب أدخل التخصص اللي أباه .. أدعي إنو ربنا يكتبلي الخير حيث كان

هو أعلم بقدراتي و هو أعلم بما تشتهيه نفسي و أعلم بحلمي و أعلم بمكان الخير 

و هو اللي حيحطني في المكان اللي منجد حيخليني الإنسانة اللي أبغاها و حأفتخر إني هيا إن شاءالله

يارب تكونوا أستفدتوا من التجربة 

اتأثرت يوم كتبت الخاتمة كنت شوية و اتحمس و أقول الله يعيدها ههههههه

 إن شاءالله ربي يكتبلكم الخير حيث كان و يرزقكم الرضا و القناعة 

( لا تنسوا وعده سبحانه و تعالى ( و لسوف يعطيك ربك فترضى

و صلى اللهم و بارك على سيدنا محمد  <3

توتة

تجربتي كطالبة سنة تحضيرية #١

السلام عليكم و رحمة الله و بركاته 

هلا والله !

بوست اليوم حتكلم فيه عن تجربتي كطالبة سنة تحضيرية في جامعة الملك عبد العزيز  

و دا أول جزء من التجربة و الباقي في البوستات الجاية *لأنو الكلام كتير و مابا أطفشكم*

طبعاً دا إهداء لخريجات دفعة ٢٠١٣ الجميلات و اللي بعدهم ؛)

ألف مبروك التخرج و ياااارب تكون سنة خير و بركة عليكم ، الله يفتحلكم أبواب التوفيق و النجاح و إن شاءالله تحققوا كل اللي تتمنوه :*

 باسم الله نبدأ ،

السنة التحضيرية بالنسبة ليا دخلتها و أنا حاطة في بالي فكرة إنها إن شاءالله حتكون سنة سهلة و إن شاءالله ربي حيسهل أموري فيها و يكتبلي فيها كل خير و دي يا حبايب نصيحتي الأولى: إنكم تدخلوها و تحطوا الفكرة دي في راسكم! كل الكلام اللي سمعتوه أو قرأتوه أو مدري من فين جبتوه و أداكم فكرة سيئة عن السنة دي طوالي امسحوه و هيئوا نفسكم لسنة سهلة بإذن الله .. بس طويلة !

أنوه إنو دي تجربتي أنا شخصياً و دول دكاترتي في فرع الجامعة الرئيسي في السليمانية و ماعرف نظام البقية ! بس الاختبار موحد و بالتالي إن شاءالله حتستفيدوا من الكلام اللي هنا حتى لو اختلفوا اللي بيدرسوكم 

الترم الأول: خطة باء

بدأت السنة بخطة باء و هي تتضمن ٣ مواد أساسية *غير اللغة الإنجليزية* ( أحياء ، كيمياء ، إحصاء ) أخدت الأحياء مع دكتورة حنان شاذلي و الكيمياء مع دكتورة نها وزان و أخيراً الإحصاء مع أستاذة شفياة حضيرة

نصيحة! حاولوا ما تعادلوا اللغة الإنجليزية بالزات لو كنتوا شطار فيها ، صح حتطفشوا و اسألوني عن كمية الطفش اللي جاتني من المادة  دي و صح حتحسوا إنكم بتضيعوا وقت لكن استغلوا شطارتكم فيها و خلوها كبونس لكم لأنها حترفعلكم المعدل بطريقة جيدة والله ، يعني تضمنوا A+ في وحدة من المواد :D 

و قبل لا أكمل أحب أقولكم النصيحة التالتة و الأهم و حتسمعوها مني كتير : زاكروا أول بأول (نقطة)

الأحياء: و ما أدراك ما الأحياء! .. يبغالو كمية فهم كبيرة و لكن أغلبو حفظ و عشان كدا ، حاولوا تزاكروه أول بأول عشان في مصطلحات جديدة عليكم و في كلام كتير يادوب تلحقوا تحفظوا مين و إيش ليلة الاختبار!

الحلو في المادة دي إنو الجزئية اللي تختبروا فيها دوري ، بعد الاختبار يمديكم تفرمتوها طوالي لأنها مو داخلة النهاااائي ! 

دكتورة الأحياء حنان الصراحة كانت وحدة جداً لطيفة و ظريفة و نصوحة ماشاءالله لا تغركم بجديتها في بداية الترم ، صدقوني بس تتعود عليكم تفك هروج و ساعات تنسى الشرح و لما يحصل دا الشي لا تنبسطوا و تخلوها تكمل هرجها ! رجعوها للشرح عشان لا تروح عليكم المحاضرة و تضطروا تجوا بعدين و تتأخروا في المنهج -_-

*معليش خليكم جديين شوية ياخي :p*

إيش تزاكروا ؟ عليكم بالملزمة اللي في يدكم ، حاولوا تشوفوا هيا تتكي على أي معلومة و تأشروا عليها و غالباً دكتورة حنان الله يسعدها تقولكم إيش المهم لو اهتميتوا و سألتوها لأنها طيبة و تساعد و ما تقصر

كمان ، لا تنسوا الأسئلة التدريبية أو Training questions
مرة مهم و بيجيبوا منو في الاختبار ، صحبتي ماشاءالله كانت بتتدرب عليه كل مرة و مرة ، و بتقولي بعد كل اختبار انو جا من اللي هيا اتدربت عليه فلا تنسوووه! و كمان لا تنسوا تحفظوا و تفهموا و تصموا ال٢٠ سؤال اللي حتدلكم عليها الدكتورة بنفسها هيا حتقولكم  فينو و إنو ١٠ من الأسئلة دي تجي من الاختبار! و فعلاً ١٠ منهم تجي بالحرف الواحد *ششششش سر: ساعات يجيبوا أكتر من ١٠* و دا شي كويس لأنكم حتدخلوا الاختبار واثقين على الأقل من ١٠ أسئلة من أصل ٣٠ ;)

إيش كمان ؟ ما أفتكر أدونا بونس في المادة دي للأسف :(

نروح للكيمياء! قبل كل شي لازم تعرفوا إنو تأسيس الكيمياء تبعي في الثانوي جداً جداً سيء! درست ٣ أترام كيمياء و ما حبيت و فهمت الكيمياء من قلب إلا مع أبلة آمنة مدخلي آخر ترم الله يسعدها يارب ،و الباقي الله يستر عليهم بس :/

و بالتالي ..

اتنكبت نكبة في كيمياء الجامعة هههههههههه ماشاءالله الدكتورة تقول " و دا أكيد أخدتوه " و البنات الصلاة عالنبي يوافقوها و يقولوها إيوا و أولهم ماشاءالله صحبتي تقولي إيوا أفتكر أخدناه و أنا صرصار الليل يلعب في راسي -__-

المهم ترا كل اللي أدتني هوا أبلة آمنة أخدتو في آخر محاضرة ( الكيمياء العضوية ) و ديكا كانت أمتع و أحسن محاضرة كيمياء في الجامعة و في الحياة عشان أخيراً حسيتني ماشية معاهم هههههههه

نرجع لموضوعنا!

زاكروه أول بأول لأنو معلوماتو كتيرة نوعاً ما ، انتبهوا كتير للتيست بانك ، الصراحة ما قيد زاكرت منو لكن سمعت ناس كتيرة تقول إنو مهم بالذات لو تاخدوا مع دكتورة ليلى الحربي أكيد حتوصيكم عليه لأنو من شغلها

دكتورة نها برضو جداً طيبة بس حاولوا ما تقرقروا كتير في محاضرتها لأنو أولاً كيف حتفهموا ؟ و كيف غيركم حيفهم ؟ و تانياً عشان لا تطلعكم برا و تحطوا نفسكم في موائف بااااايخة :( و الدكتورة دي لو تروحيلها ساعاتها المكتبية و عموماً كل الدكاترة كدا ما تقصر معاكي و تشرحلك اللي تبيه بالزات وقت ما تشوفي اوراق الاختبار و أنا مجربة

مافي كلام كتير عالكيمياء كمادة ، نفسها حقت الثانوي يعني يعتمد على اللي درستوه في الثانوي ، ولا تنسوا تزاكروا الملزمة  أو السلايدات ، الكتاب سيبوكم منو لكن لو ارتحتولو زي بعض البنات اللي أعرفهم سووا اللي يريحكم إنتو ، كمان لا تنسوا تزاكروا أسئلة الأترام اللي فاتت ، اطبعوها و زاكروها و حاولوا تحلوها .. طبعاً لو تأسيسكم حق الثانوي خيخة زيي كل اللي عليكم تشدوا حيلكم أكتر دحين و تتسهل باقي أموركم بإذن الله

الإحصاااااء: الصراحة من الثانوي حابة الإحصاء أكتر من الرياضيات و لحد يسألني ليش ، المادة دي برضو من بتوع المزاكرة أول بأول و تحتاجلها تركيز ، غير كدا أول فصل كلو نظري يعني حفظ يعني إيش ؟ لازم تزاكروه من بدري عشان حتجيكم مصطلحات جديدة كتيرة في المنهج !

اللي حتزاكروا منو: دفتر محاضرتكم ! كل اللي هيا تكتبوا أكتبوه وراها أو صوروه ، ماعرف دبروا نفسكم لأنو حيفيدكم مرة ، في البداية حتقولكم اطبعوا جدول تشوفوا فيه اللي ليكم و عليكم و الواجبات اللي بتديكم هيا في الجدول حلوها و السكاشن احضروها صدقوني انتوا اللي حتستفيدوا لأنو كتدريب لكم ، و برضو في نماذج لأسئلة الاترام اللي فاتت مهمة لأنو حيجيبولكم نمط الأسئلة اللي ممكن عليها يجي الاختبار و دا حيفيدكم كتير !
أستاذة شفياء أكتر إنسانة شافت وجهي و صحباتي من كتر ما نجيها المكتب و كل مرة الله يسعدها تستقبلنا برحابة صدر .. مع إنو آخر مرة أدتنا وجه الـ(استغفرالله منكم) ههههههه بس أهم شي دايما تشرحلنا و تساعدنا و ما تقصر .. شرحها تمام ماشاءالله بس أحياناً تسرع بزيادة و هنا ممكن ترفعوا يدكم بشويش و تنبهوها عشان تقدروا تفهموا

هل في بونس ؟ لا و مو شي مضمون ! ساعات ممكن يقولولكم انهم يمكن يعملولكم كيرف أب و دا يعني إنهم يحطوا نسبة موحدة حسب علامات البنات و يضيفوها للكل بس مو دايماً يعملوها و مدري لو عملوها على ترمي 

أبداً أبداً لا تعتمدوا على هرجة البونس أو الكيرف أب لو دكاتركم أو أساتذتكم ما جابوا سيرتهم بنفسهم !

الإنجليزي: الحمدلله بدأت من المستوى الرابع و يعتبر الأسهل لأنو تطبيق المستويات اللي قبلو و ما فيلو مزاكرة داكا الشي ممكن تاخدوها كتسلية و تضييع وقت و خلوها عندكم عشان ترفعوا معدلكم بيها و الصراحة لولا الله ثم المادة دي أحس معدلي كان بيروح فيها :( فالحمدلله يارب
المادة دي زييها زي اللي في المدرسة ، في اختبار Speaking و Writing و على حسب اللي تدرسك ممكن وقت اختبار الـSpeaking تخليكم تتكلموا قدام الكلاس و ممكن على انفراد إنتي و الاستاذة
الاختبار إلكتروني و سهل بإذن الله و يتضمن Grammars, Vocabulary, Reading و ضمن الاختبار الإلكتروني دا في اختبار Hearing فجهزوا نفسكم ليه دايماً

بعد كل اختبار دوري في المواد دي *ما عدا الإنجليزي* حتقولكم الدكتورة أو الأستاذة إنو أوراق الاختبار عندها لو حابين تمروا مكتبها تشوفوه ، و أنصحكم تشوفوه خاصة لو نقصتوا عشان تشوفوا خطأكم ، غير كدا أحياناً يكون في خطأ في التصحيح! مثلاً حليتوا مزبوط و خرجتوا واثقين و فجأة جبتو درجة مو كويسة ! راجعوا ورق الاختبار و اتأكدوا لأنها حتديكم ورقتكم و ورقة الإجابات
عشان تقارنوا بينهم

و دي تجربتي في الترم الأول : خطة باء

مو بطال صح ؟

  الترم التاني : خطة ألف في البوست الجاي إن شاء الله

نصيحتي الرابعة: لا تسمعوا كلام أحد و لا حتى كلامي لو سمعتوا عن شي إنو صعب من غير ما تجربوه ، صدقوني اللي صعب على غيركم ممكن يكون سهل عليكم و العكس و دي مجرد تجربتي أنا شخصياً و لكم حرية تاخدوا بآرائي و نصايحي أو لأ ، المهم دايماً شجعوا نفسكم و لا تنحبطوا باللي تسمعوه لأنو ممكن تتفاجئوا بالعكس تمااااماً !

معليش طولت *قلتلكم هروجي طويلة*
و إن شاءالله تكونوا استفدتوا

 لو عندكم أي سؤال أو استفسار
Tweet me @Taghreed_F

توتة.